Shillong, Jylliew 10 : U Myntri kam bording Bah Metbah Lyngdoh ha ka sngi Balang ula iathuh ba ka Meghalaya Energy Corporation Limited (MeECL) kan sa shimti hi noh ban sam bording ha Mawsynram Sub-Division hadien ba ka Sorkar kala rai ban pynkut noh ia ka jingshakri ka SAI Computer Ltd.

Kane ka rai kala mih hadien ka jingdawa na ki MLA ka thain kynthup ia u MLA kaMawsynram, Mawphlang bad Ranikor.

“Ngi la rai ban pynkut noh ia ka shithi bala ai sha ka SAI Computer Ltd bad ka Corporation kan sa shimti hi noh…ka mat hangne ka ngi kwah ban ong ka long ba ngi kwah ban iohi ba ki paidbah jong katei ka thain kim dei ban mad ia ki jingjynjar na kaei ka rai kaba ngin shim. Ngi kwah ban iohi ba ka jingshimti kan long kaba iaid beit iaid ryntih bad ngi kwah ban ai ia ka jingshakri kaba biang eh ia ki paidbah” ula ong haba iakren bad ki nongthoh khubor.

U iathuh ba ka Sorkar kala shim ia ki jingai jingmut ki stad ain namar kane ka kam ka long sub judice, bad kane ka sienjam ka long beit thik tang ia ka Mawsynram Sub-Division.

Halor ka jingai pyniaid noh sha ki kompani shimet ia ka MeECL, u Bah Metbah ula pynshai ba ka Sorkar kam don satia ia kum kane ka jingthmu bad kala pynleit jingmut ban pynkhie im ia kane ka Tnad.