Agartala, Jan 15 : TIPRA Motha Party-ni dilgiparang, Kokborok ku·sik-ko Roman oikor-chi se·na jakkalna aro somoi gita Tripura Tribal Areas Autonomous District Council (TTAADC)-ni election-rangko ong·atchina dabianiko dakna Tripura-ni Skotong Minister Manik Saha-ko grongangaha.
TTAADC-o lekka pora skie ra·aniko nirokgipa Rabindra Debbarma-ni dilanio TIPRA Motha-ni MLA-rang aro MDC-rangba ia grong·anio dongpaa. Skotong Minister baksa gronganio adita neng·nikanirangko man·a jamansa ia tom·bimonganiko dakangaha ine Party-ni ku·wattimgipa aro gitcham MLA Rajeshwar Debbarma u·iatangaha.
Uamangni dabiani bidingo uamang talen Skotong Minister-na u·iatman·aha ong·oba, ua maming ku·rachakanikode dakkuja, indiba uamang sorkarini aganchakanina sengkuenga ineba Rajeshwar Debbarma agandapangkuaha.
Roman oikor-ko jakkalanio neng·nikani bidingo, Skotong Minister Manik Saha, uamangni chittirangko CBSE aro ICSE-na watatahachim indiba maming aganchakaniko man·sokujaenga ineba Rabindra Debbarma janapataha. Skotong Minister, TIPRA Motha-ni dilgiparangko iani bidingo koborrangko ra·na New Delhi-ona re·angchina ku·pattiatengon, ua Tripura Board of Secondary Education baksa agan-golpogrikaniko dakangskagen ineba u·iatangkuaha.
Iani gisepon, TIPRA Motha dol batanggimin somoio Village Committee election-rangko ru·utatani gimin TTAADC election-rangkoba ru·utatnaba gnang ine jajrenganiko parakataha. A·doko sason ka·ani aro namroro silroroaniko ra·bana election-rangko somoi gita ong·atna nangchongmotani ong·a.
Roman oikor-ni bidingo BJP baksa nangrimgipa dol aro TIPRA Motha-ni gisepo neng·nikanirang ong·ani gisepon ia tom·bimonganiko ong·atangaha. TTAADC-ni election-rangko re·baenggipa jagni-ni gisepo ong·atna ka·dongsoengon, political dolgnini gisepo susagrikanirang batroroengaha.
