Shillong, Naitung18 : U Myntri Rangbah ka Jylla Conrad K Sangma ha ka sngi Saitjain, ula kyrpad ia u shipai bala shongthait, ym ia ki Myntri Sorkar ne Ophisar- ban plie ia ka Office ba dang tei thymmai jong ka Sorkar ha Sohiong, haba pynpaw ba ia ki jingtei u paidbah dei ban aiti sha ki paidbah baka thmu ban shakri.
Kane ka Ophis ka Sorkar ka dei ka Block Integrated Development Office ha Sohiong C& RD Block kaba la tei ha ka jinglut ba T.2.77 klur.
Ia kane ka Ophis la plie da u Bah Pyntngenlang Nongrang jong ka shnong Nongur, uba la shakri haduh 17 snem ha ka 1st Assam Reginment jong ka Indian Army, ha ka jingialang kaba u Myntri Rangbah ula plie artad ia ka CM Connect Centre ban pynbna ia ki project kam pynroi kiba kot jan T.146 klur.
“Ka judei ka rukom ba ia ki Building bad jingtei ka Sorkar la ju plie da ki kongsan lane ki heh ophisar, Nga ngeit ba ki dei ban hap ploe da ki briew napoh ka shnong. Ka ai ia ki trai shnong ia ka burom bad pynlong ia ka jingialang kaba kham don jingmut” ong u Conrad.
Haba niew kum ka sngi ba kyrpang ia ka Sohiong, u Myntri Rangbah ula aiti ia phra tylli ki project bala dep pyntrei ba kot T.5.48 klur sha ki paidbah bad buh ia u mawnongrim ban pyntrei sa khyndai tylli ki project kiba shongdor T.140.74 klur, kaba kynthup ia ka project umbam umdih, ka surok shnong, ki jingtei kam jngohkai, ka jingpynpoi um sha ki jaka rep bad ki jaka ialehkai.
Napdeng ki project kiba heh bala pynbna ki dei ka jingtei pynheh ia ka Greater Sohiong Water Supply Scheme ba T.34.53 klur, artylli ki project surok ba T.20.58 klur, ka Dewlieh Mawrisnai Flow Irrigation Project, ka madan ialehkai futsal, ka jingtei kam jngohkai ha Kynroh Viewpoint, ka Sohiong View Point, ka Nongkasen Tree House bad Lum Diengiei.
Ka Sorkar kala plie ruh ia bun ki jingtei kiba dei na ka bynta ka bit ka biang ka shnong kynthup ia ka CM Connect Centre, ka Block Resource Centre na ka bynta ki skul, ki digital library bad ki haka pule lyngba ki kor internet ha ki 13 tylli ki shnong, ka plastic waste management unit, ki iew na ka bynta ki nongrep bad kiwei kiwei.
Ha kane ka prokram u CM ula iakren markhmat bad ki nongshnongshnong, kiba la pynpaw ia ka jingsngewkhia halor ka jingshah rong noh ki khyndew ha ka umslap, ka jingpynslem ia ka Chief Minister’s Solar Mission, ka jingbym biang ki surok ha bun tylli ki shnong, ka jingduna ban ioh ia ka umbam umdih, ka jingbym don ki jingtei Cold Storage ne kudan pynpjah ia ki mar, ki jingduna ki jingtei ha Iew, ka insurance na ka bynta ki jingthung jingtep bad ki jingri jingdup, bad ka jingdonkam ia kham bun ki skul Sorkar bad ki Vocational Training Centre.
Haba jubab ia kine ki jingud jingnam, u Conrad ula ong ba bun ki jingeh ba la pynsngew ki dei kiba dang don hapdeng ka jingpyntreikam haba kular ia ki nongshongshnong ba ia kiwei pat ki jingeh yn sa shimkhia ban leh eiei da ki Tnad kiba dei khmih.
Haba batai ia ka CM Connect kum ka rynsan ban weng ia ka jingeh u paidbah, u Myntri Rangbah ula ong ba ka synshar khadae ka dei ban long eh halor ka jingsngap ia ki paidbah bad ban leh eiei kat kum ki jingdonkam jong ki.
“Ka synshar khadar ka dei ka kam kaba iai bteng. Ka long kaba kongsan ban buh hakhmat eh ia u paidbah haba pynneh ia ka jingiohijngai bad ka thong kaba shai” ula ong.
Kiba la iadonlang ki kynthup ia u Myntri ka Tnad Community & Rural Development Bah Sosthenes Sohtun, MLA ka Sohiong Bah Synshar Kupar Roy Lyngdoh Thabah, bad ki Heh Ophisar jong ka District.
Ha kane ka sngi la sam ruh ia ki cheque sha ki Village Organisation kum ka jingithuh ia ka jingshakri jong ki ia ka imlang sahlang, bad la aiti ruh ia ki santion order sha kiSelg Help Group bapher bapher.
Pule ruh : Hukum ka High Court ban aiti shawei ia ka jingtohkit, kurup CCTV ba iap ka Khynnah ha Nongpoh
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
