Shillong, Jan 7: Sima ari jolrango a•songna chel•chakaniko on•anio Border Security Force (BSF) dolna kamrangko dakchake on•na man•na gita rokomgni achakrangko jile, dingtangmancha skie on•enga ine official-rang u•iataha.

Ia ja•ku de•aniko BSF dol, a•songni Prime Minister Narendra Modi-ni ra•gatgipa ‘Local for Vocal’ program-o pangchake a•bachengataha.

Official-rangni kobor on•ani gitade, Meghalaya aro Bangladesh a•songni sima ari jolrango BSF dol, ‘Rajapalayam’ aro ‘Mudhol’ rokomni achakrangko jile skie on•na a•bachengahani gimin da•o dipet komibeoba BSF dolo mang 24 achakrang dakchake on•enga.

Sima ari jolrango re•rurae nirok sandianirango BSF dolko dakchakna gita Shillong-ni BSF dol, ia rokomgni achakrangko skie on•na gita tik ka•aha aro mikkangchi iako dake nianio chu•sokgipa ong•enga ine nikgenchimode gipin rokomni achakrangkoba jile skie on•anggen ine u•iataha.

Da•o dipet ia Rajapalaya aro Mudhol achakrangko BSF dol, dake niani gitasa skie on•engkua ineba official-rang u•iataha.

“Ia achakrangna skie on•manahaon chinga achakrangko, sima ari jolrango re•rurae nirok sandianirango jakkalanggen,” ine Meghalaya BSF-ni official parakataha.
Achakrangna skie on•na gita komibeoba bilsisade somoiko nanggen ineba BSF official parakataha.