Tura, Nov 6: Chang 49-gipa 100 Drums Wangala manianiko Bristibar salo, Wangala A•dam Chibragre-o a•bachengataha aro ia manianiko, Meghalaya a•dokni Chief Minister Conrad K Sangma-ni jakchi do•ga oe on•angaha.
Ia changoba 100 Drums Wangala manianio dol 10 Wangalgipa dolrang bak ra•enga aro ia dolrangara, Tosekgre, Chidaogre, Rapdikgre, Chibragre, Dalbenggre, Wa•nok Damgre, Chepagre, Tura Wangala Troupe, Sadolbra, aro Gondenggre dolrang ong•a.
Ia chang 49-gipa 100 Drums Wangala manianiko, Rev Dilseng M Sangma aro Rev Fr Januarius S Sangma-ni Isolo bi•anichi a•bachengataha aro uni ja•man jinma ‘Dimdim Dimchong Dachichong’ Wangala gitko ring•aha.
Ia chang 49-gipa 100 Drums Wangala manianiko do•ga oe on•anganio a•dokni Chief Minister, jinmana aganprakengon, re•baenggipa bilsiode ia 100 Drums Wangala maniani bilsi 50 gapengaha aro ia 100 Drums Wangala maniani bilsi 50 gapaniko maniani bak gita ‘1000 Drums Wangala manianiko’ skanggipa changna ong•atna sienga ine parakataha.
100 Drums Wangala maniani bilsi 50 gapaniko ga•subate manina man•na gita state level committee-ko songchina ku•pattianiko on•angengon, ia bilsi 50 gapaniko manianio a•dok sorkarini pilak department-rangan Hundred Drums Wangala Festival Committee (HDWFC)-na dakchakanirangko on•anggen ine Chief Minister ku•rachakaniko on•angaha.
Ia bilsini 100 Drums Wangala manianiko ong•atna gita a•dok sorkari, gong lak 25 tangkako Hundred Drums Wangala Festival Committee (HDWFC)-na chamataha ine u•iatengon, ia 100 Drums Wangala manianiko ong•atenggipa Wangala A•dam Chibragre-ona ramako tarina gitaba sorkari, gong crore 20 tangkarangko chamataha ine Chief Minister parakataha.
Jatni daka rikani aro man•rikanirangko am•sandina gita a•dok sorkari dingtang dingtang program-rangko a•bachengataha ine janapatskaengon, jatni daka rikani aro doka dam•anirangko am•sandie see rakkina gita a•dok sorkarini a•bachengatgipa Chief Minister’s Research Grant-ni gimin Chief Minister, jinmana talate on•angaha.
Ia 100 Drums Wangala manianiko a•bachengatanio, Gambegre constituency-ni MLA Mehtab Chandee A Sangma, a•dokni Chief Secretary Dr Shakil Ahammed, West Garo Hills a•jani Deputy Commissioner Vibhor Aggarwa, SP Abraham T Sangma aro gipin official-rangba bak ra•angtokaha.
Na·simang iakoba nina man·gen:
Na·simang iakoba poraina man·gen: Chef Nambie M’laya-ni mi-ko BIRC 2025-o mesokanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
