Shillong, Apr 1: Meghalaya a•doko Digital Connectivity ba internet gita dakgipa kolrangko nambatatna Budbar salo, Meghalaya sorkari, Starlink India baksa Letter of Intent (LoI)-o soi ka•grikangaha aro ia soi ka•grikanio Meghalaya a•dokni Chief Minister Conrad K Sangma-ba video conference gita bak ra•angpaaha.
Namroro silroroaniko aro dal•roroaniko ra•baanio technology-ara mongsonggipa kamko ka•gipa gita ong•ani gimin Meghalaya sorkarini, Starlink India baksa LoI-o soi ka•grikaniara, 2028 bilsini gisepo a•dokni economy-ko US Dollar Billion 10 ong•atna a•dok sorkarini niksamsoaniko chu•sokatna ja•ku de•ani gita ong•aha.
Dolgni soi ka•grikanio Meghalaya sorkarini pal, a•dokni Education Minister Lahkmen Rymbui, Additional Chief Secretary aro Development Commissioner Sampath Kumar baksana gipin official-rang bak ra•angaha aro Starlink India-ni pal SpaceX-ni President aro COO Gwynnw Shotwell, Starlink Business Operations-ni Vice President Lauren Dreyer, Starlink India-ni Country Head Prabhakar Jayakumar aro gipinrang bak ra•angskaaha.
Ia soi ka•grikani program-o video conference gita bak ra•angengon, Meghalaya a•dokni dal•roroani bidingo talataniko on•angenba, namroro silroroani kamrangko ka•anio internet gita dakgipa kolrangara namen nangchongmotgipa ong•a ine Chief Minister aganaha.
Batanggimin bilsichetni gisepo Meghalaya sorkari, sorkarini kamrangko manderangona sepangbatatna gita gisik on•e kamko ka•aha ineba Chief Minister aganaha.
A•dokni ki•tikbriona internet-rangko sokatanio neng•nikanirangko chagrongna nangkuenga ine janapatengon, a•dokni diltubatsranggipa health centre-rangona, sub-centre-rangon, skulrangna aro songrangona sorkari optical fibre network-rangko on•na jotton ka•enga indiba ia kamrango bang•en somoirangko nangenga ine Sangma aganaha.
Starlink India baksa soi ka•grikanichi a•doko dingtanganiko ra•bana man•gnok ine an•tangni ka•dongchakenganiko parakangengon, ia ja•ku de•anichi an•seng baljokaniko on•e mande saksani janggiko jokatna man•genchimoba, bi•sa saksa namgipa lekka porako man•genchimoba ba game ge•e cha•gipa mande saksani janggi tanganiko nambatatna man•genchimoba ian orto gnanggipa chu•sokani ong•gen ine Chief Minister aganaha.
Meghalaya a•doko IT-ni kamrangko nambatatna sorkari ka•enggipa kamrangni giminba Chief Minister, agan-talate on•angaha.
Ia tom•anio SpaceX-ni President aro COO Gwynne Shotwell-ba aganprakengon, Starlink India baksa LoI-o soi ka•grikahani gimin Meghalaya sorkariko aro Chief Minister-ko mittelpilangenba, Starlink-ni mongsonggipa kaman, internet-rangko man•kugijagipa biaprango ta•rakbate internet-rangko on•anian ong•a ine parakataha.
Meghalaya a•doko Digital Connectivity-ko nambatatanichi, lekka pora, an•seng baljokani aro bading chiwalani kamrango tang•doaniko nikna man•gen ineba Shotwell aganaha.
Na·simang iakoba nina man·gen:
Na·simang iakoba poraina man·gen: Himanta Biswa Sarma-ni BJP sorkari manderangko togienga ine Pawan Khera matnanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
