Shillong, Jan 6: GVK-EMRI-o kam ka·giparangni kam dontongate jingjengataniko ra·galchina sorkari didiatahaoba, uamangni jingjengataniko ra·galna Meghalaya EMRI Workers Union jegalattaiaha.
EMRI-o kam ka·enggipa gimik sak 250 manderang, re·anggipa Sombar waljatchionin kamrangko ka·gija jingjengatengani a·sel 108 ambulance-rang da·o sagipa manderangko saljaengachim.
EMRI-o kam ka·enggiparangni dormaharangko bariatchina aro uamangni kamrangko regularise ka·china gita dabie Meghalaya EMRI Workers Union, kamrangko ka·gija jingjengattokengachim.
COVID sajinmani somoirango uamang neng·bee kamrangko ka·tokengoba EMRI-ko chalaienggipa manderang, uamangni dabianirangko knachakna gisiko nangjaenga ine union matnangenba, kamranko ka·gija jingjengattokengachim.
Re·anggipa Budbar salo Health department-ni Principal Secretary Sampath Kumar, union-ni dilgiparangko grongenba, uamangni dabianirangko niatna ku·rachakahachim indiba uamangni dabianirangko chu·sokatna gita sorkarini see on·aniko man·kujaskal EMRI-o kam ka·enggiparangni jingjengataniko dontongkujawa ine union-ni dilgiparang parakatskaahachim.
