Itanagar, Oct 18: Sombar salo, Meghalaya a•dokni Chief Minister Conrad K Sangma, Arunachal Pradesh a•dokni skotong Itanagar songjinmao donggipa Jawaharlal Nehru State Museum-ko nieaha.
‘Regional Aspirations, National Outlook’ ine pangchakaniko done, October-ni 19 tariko National People’s Party (NPP) Arunachal Unit-ni Itanagar-o ong•atenggipa tom•anio dongpana gita NPP-ni national president aro Meghalaya a•dokni Chief Minister Conrad K Sangma, salgnina Arunachal Pradesh a•dokona re•angaha aro ua Robibar attamo Itanagar songjinmaona sokangahachim.
Itanagar-ni Jawaharlal Nehru State Museum-o dingtang dingtang jatrangni daka rikanirangko manderangna mesokna donaniko nike Conrad namen aiao inmanbeaha.
“Ian namen nitobegipa aro name chalaienggipa museum ong•a aro ia museum-o Arunachal a•dokni ja•rikenggipa daka rikanirangko manderangna rongtalen mesokenga. Ia museum-o tarie dongipa bosturangko nike anga namen aiao inmanbeaha maina Arunachal-o iandakgipa bosturang donga ine anga ma•sijachim,” ine Itanagar Museum-ona re•angani ja•man Conrad aganaha.
Ia museum-ara salgro salaram jolnikosan ong•aigija India a•song gimiko dingtang dingtang jatrangni dakbewal rikbewalko mesokani ong•a ineba ua aganaha.
‘Regional Aspirations, National Outlook’ ine pangchakaniko done tom•aniko ong•atenggipani bidingo janapatengon, ian salgro salaram a•dokrangna namen nangchongmotgipa katta bichong ong•enga aro iani bidingo dingtang dingtang manderang re•bae chanchirimdilanggen ine NPP-ni national president parakataha.
