Williamnagar, July 28: Meghalaya a•dokni skanggipa aro salgro salaram jolrango gnigipa Centrifuged Latex Manufacturing Unit-ko Sombar salo, Meghalaya a•dokni Chief Minister Conrad K Sangma, East Garo Hills a•jani Songsak C&RD Block ning•o donggipa Koksi Nengsat songo kulie on•angaha.
Ia Centrifuged Latex Manufacturing Unit-ko Mendipathar Multipurpose Cooperative Society-ko kulidilgipa Sr Rose rikaha aro iana karkana Meghalaya Basin Management Agency-ni ning•o a•dok sorkari, gong crore 18.8 tangkarangko dakchake on•aha.
Ia karkanako kulianichi, Garo Hills-o rubber bagan dake cha•enggipa sak 3000-mangni gita manderang namgniko man•gnok.
Ia Centrifuged Latex Manufacturing Unit-ko kulie on•anganio a•dokni Chief Minister aganprakatengon, ia karkanara rubber bagan dake cha•enggipa manderangna namgniko ra•bana siengani gimin ian Garo Hills-na aro Meghalaya a•dok gimiknan namgni ong•gnok ine parakataha.
2018 bilsio sorkariko rikchenga intalan uamang, game ge•e cha•enggipa manderangni neng•nikanirangko ma•sie ra•enba, dakchakanirangko on•na jotton ka•enga ine janapatengon, a•doko game ge•e cha•enggipa manderangni namgnina sorkari, FOCUS, FOCUS+, CM Farm+ aro uandakgipa dingtang dingtang scheme aro program-rangko a•bachengate on•aha ine Chief Minister parakataha.
A•songo game ge•e cha•enggipa manderangni man•gniko changgni bariatna a•songni Prime Minister nisanko donaha ine janapatskaengon, Meghalaya a•dokode bang•bata manderangan gama ge•anirango pangchake janggi tanggiparang ong•ani gimin game ge•e cha•giparangni man•gniko changgnina baten bariatna nangenga ine Sangma aganaha.
Meghalaya a•dokko Billion dollar 10 economy ong•atna nisan donako chu•sokatna gita game ge•e cha•enggipa manderangni janggi tanganiko namdapatna aro cholrangko on•na nangenga ineba Chief Minister aganaha.
Garo Hills-o a•bachengatgipa karkanarang, jekai Nokma Ice Cream, Awang Chips aro uandakgipa dingtang dingtang karkanarangni gimin janapatengon, ia karkanarang, Rongara, Tikrikilla aro Mendipathar jolrango game ge•e cha•giparangna bang•en namgnirangko on•engaha ine Sangma aganaha.
Rubber sheet karkanako chalaianio, gipin biaprangoni re•bagipa manderangni a•sel neng•nikanirangko chagrongna nangaha indiba da•o ia karkanako kulianichi rubber bagan dake cha•enggipa manderangna namgniko ra•baskagnok ine janapatengon, Garo Hills-o rubber bagan dake cha•enggipa pilak manderangkon, ia karkanana an•tangtangni rubber-rangko palchina Chief Minister ku•pattiangaha.
Ia karkanako kulina program-ko ong•atanio a•dokni Chief Minister, Meghalaya a•dokni skanggipa fruit dehydration unit-naba pangchakaniko songe on•angjolaha.
Ia fruit dehydration unit-ko gong crore 23 korosrangchi kulina sienga aro ia karkanako re•baenggipa 2026 bilsini November jao matchotna sienga.
Ia karkanako kulie on•angani somoio a•dokni PHE Minister Marcuise N Marak, Mendipathar-ni MLA Marthon Sangma aro MMCS-ni secretary Sr Rose-ba dongpaaha.
Na·simang iakoba nina man·gen:
Na·simang iakoba poraina man·gen: Bangladesh-ni Chief Adiver Dhaka-o sildoreng a·sel ong·anio nangchakea man·giparangna sana bananiko on·anina India-ko mitela
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
