Guwahati, Sept 23: Sorkarini a·ao niam gri dongenggipa nokdangrangko rikgale galmiting somoio obostarang namjabataona sokangani gimin police-ni slai goanio Assam, Darrang district-ni Sipajhar songoni komibeoba sakgni manderang siaha ine koborna parakataha.
Koborni gita, Darrang district administration baksana police dolrangni Bristibar salo Sipajhar songo niam gri dongenggipa nokdang ge 500-ko a·rikgalna re·angmiting somoio kajia-golmal namen dal·aha. Indake dolgnini gisepo nangrikanio sakdok manderang baksana adita sak policerangba mata-bu·anirangko man·tokaha.
Ia ong·a obostani bidingo Darrang Superintendent of Police Pa Susanta Biswa Sarma-ni aganani gitade, niam gri songdonggiparangko a·rikgalna gita Sipajhar-Dholpur jolona re·angon obostarang namroroangjani gimin kajia ka·giparangko sason man·na gita rebetrangchi dokruruna jotton ka·achim indiba uamang police-rangko chadrapaha uni gimin slaichi gona ga·akanio bang·a manderang saknatokaha aro adita sak police-rangba jokkom ong·tokaha ine agan-talataha.
Sorkarini a·ao dongenggipa gimik nokdang ge 800-ko mija Sombar saloba ua biaponiko a·rikgalaha jenan Assam sorkarini kosako manderang matnangangtokahachim.
Unomiting Assam-ni skotong minister Pa Himanta Biswa Sarma-ni koborna agananganio, niam gri napdrabae donggiparangko a·rikgalmiting somoio biapo songdonggiparang matsramgipa silchidare aro ro·ongrangchi police-rangko chadrapaha jeni gimino slaichi gona nangao ga·akaha ine agane, a·arangko wate on·kujana kingkingde chingni uamangko rikgalaniko dongtongkujawa ine skotong minister parakataha.
Ia ong·a obostao manderangni janggi gimaanina Assam Congress-ni padot Bhupen Borah, a·dok sorkarini kosako raken jegalatenba a·doko niam aro ge·etani obostako namgijaona sokatani giminba matnange aganangaha.
Ian gisik grini kam aro niam gita ong·gijako Assam sorkarini daka kam ong·a ine AIUDF-ni MLA Rafiqul Islam, koborni manderang baksa tom·ao aganaha.
“A·arangko chi man·ani ja·man a·gri-chigri ong·gipa manderang ia biapo bilsi 30-rangna kingking songdong-a·chabatokenga. Uamangba India-ni manderangan ong·a indiba biapna mangmang sorkari maini gimino ka·saninggija kamchi uamangko a·rikna nangaha. Pilakna skangba sorkari, uamangna biaprangko on·chengna nanga indiba maming dakchakaniko on·chenggija ua biaponiko sorkari uamangko maidake a·rikgalna man·a, ineba Islam sing·doangaha.
