Shillong, Feb 20: Bristibar attamo sianggipa Shillong-ni MP Dr Ricky AJ Syngkon-na Sukrobar salo, Meghalaya Legislative Assembly-ni Speaker Thomas A Sangma, uni janggi tangani gimin seaniko Assembly-o poraiatanichi, mande ra•pilskaaniko on•angaha.
Sukrobar salo, Assembly-ni gipin kamrangkode dontongatchengskaaha.
1972 bilsini January 6 tariko, Shillong songjinmani Laitumkhrah-o atchigipa Dr Syngkon, saksa skia man•begipa politician ong•achim.
Ua a•bachengo, St Edmund’s School-o poraie ja•mano Laitumkhrah Presbyterian School-o matric-ko pass ka•aha. Matric pass ka•ani ja•man Dr Syngkon, Shillong Commerce College-o commerce-ko ra•e, Pre-University-ko poraiaha.
Ja•mano ua North Eastern Hill University (NEHU)-oni Economics-o masters degree-ko aro doctorate-koba pass ka•aha.
2023 bilsio ua manderangna dangdike on•skana gita 2023 bilsini Assembly election-o Umsning constituency-oni Voice of the People’s Party (VPP)-ni candidate ong•e susachengaha. Uni ja•man ua 2024 bilsini Lok Sabha election-o Shillong parliamentary constituency-oni VPP-ni candidate ong•e susataiaha aro ia election-o ua bang•bea vote-rangchi cheenba, 18-gipa Lok Sabha-ni membor-na seokako man•aha.
Dr Syngkon-na mande ra•pilskaaniko on•angengon, parliament-ni membor ong•e Dr Syngkon-ko uni kakket ong•anina, saksa skia man•gipa ong•anina aro salgro salaram jolrangna uni on•kange kam ka•anina mingsing minggamaha ine Assembly Speaker parakataha.
Saksa Isolo bebera•gipa mande ong•e Dr Syngkon, bamani aro ka•sachakani gnang manderangna dangdike on•aha ineba Speaker aganaha.
“Anga an•tangde uko name ma•sigipa ong•pajagenchimoba, ua saksa namgipa skigipa aro politician ong•e Isolna kengipa aro Isolo kim•kime bebera•gipa ong•achim ine ma•sina man•aha. Re•anggipa 2025 bilsini December jaoba ua, Delhi-o A•chik Christian Fellowship-ni Christmas program-ko ong•atanio chingni A•chik jong-ada no-abirangna Isolni namgipa kattarangko aganprakaha. Ia salni bako anga una mande ra•pilskaaniko on•enga aro uni nokdangna aro uni pilak ka•sagiminrangna ka•dimeaniko on•china Nokgipa Isolo bi•enga,” ine Speaker parakataha.
Na·simang iakoba nina man·gen:
Na·simang iakoba poraina man·gen: Shillong MP-ni sianina VPP-ni prez kalimpaaniko paraka
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
