Agartala, March 18: Tripura Tribal Areas Autonomous District Council-ni (TTADC) election-rangko re·baenggipa jao ong·atna nichaksoengon, Budbar salo CPI(M) baksa bakrimenggipa dolrang an·tangtangni nanganirangna sorkarini kosako jegalanirangko dake re·jomengmiting somoio police-rangni jako dongdipatako man·e adita kajia-golmalrang ong·aha.
Ia re·jomaniko All India Kisan Sabha (AIKS), Ganamikti Parishad (GMP) aro Tripura Khetmazoor Union ong·atdilaha, aro iani ning·ao game cha·giparang, a·ba gamgiparang aro ge·a-gamanio hajira ka·e cha·giparangna ming-chi·gni dabianirangko chu·sokatna miksonge re·jomangaha.
Dal·dalgipa dilgiparang jekai AIKS-ni All India General Secretary Biju Krishnan aro Opposition-ni dilgipa Jitendra Chaudhury ia re·jomanio bak ra·enba tribal council-ni election-rangna skang ia jegalanirangko dakaniko bilakbatataha.
Uandake uamang tom·tome re·jomaniko a·bachengaha indiba Ravindra Bhavan-ona sokon police-rangni dongduulaniko nikeaha. Jegalaniko dakenggiparang police-rangni dongduulaniko manigija napdraangaha aro Assembly-chipakna daariangaha indiba Raj Bhavan-ni Salgrochipakni cholgugao dongdipatako man·enba, dongtimenggipa police-rang baksa kajia-golmal ong·aha.
Democratic bewalo re·jomaniko sorkari dongdipatna jotton ka·enga inenba, jegalaniko dakgiparang an·tangtangni dabianirangko tom·tome re·jomaniko champengako man·aha ine Krishnan sorkariko matnange kobor ra·timgiparangna parakataha. Una agreba, game cha·giparangna ku·chakgiminrangko chu·sokatgija, uamangni neng·nikanirangko bariatenga aro dakchakani cholrangko on·jaenga ine ua ma·mong aro a·dok sorkarini kosakoba aganangaha.
Jegalaniko dakanggipa dolrang ge·a-gamani bosturangko on·china, dongdipgija chi watna, hajirarangko bariate MGNREGA-ko sal 200-ona tang·doatna, Swaminathan formula-o pangchake minimum support price-rangko ra·gatna, loan gamanirangko watna, aro ge·a-gamanirang nosto ong·ani ba lap ong·gijanio on·pilanirangko dakskachina dabiangaha. Una agreba uamang TTADC-ko jakgitel ong·batatchina aro tangka-paisarangni bidingo bilrangko bang·bate on·china, aro unbaksa village committee-ni election-rangko seng·gnang ong·atchinaba dabiangaha.
TTAADC-na adita antirang skang ia dabianirangko dakaniara opposition dolrangni songrangni aro tribal manderangni chu·ongnikgijanirangko nangrimate parakatenba, election-na skang obostarangko dingtang ong·atani ong·a.
Na·simang iakoba nina man·gen:
Na·simang iakoba poraina man·gen: Cr 15.62-ni deficit budget-ko JHADC-ni CEM parakata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
