Senokgipa: Mahbubul Hoque: Chancellor, USTM 

September 19, 2025-o Singapore-o Zubeen Garg-ni sianichi, Assam a•doktangni mingsinggipa git ring•gipakosan gimaata ong•aija indiba namen gamchatbegipa gamkoba gimaataha. Uni rang•gitik sianganiara Assamese manderangni gisepo Srimanta Sankardeva aro Peer Ajan Fakir-ni dongramo ku•cholsan nangrimani, ka•sachakani aro jatni gisepo melianiko ra•baaha. Ritchani ritcha bilsirangna, Assam a•doko tom•tomani, chakchikgrikani aro saksa sakgipin baksa meli-nangrime songdongbaaha  aro doka-dam•ani, torom-o pangchakani aro mandesal ong•ani baksa manderang janggi tangbaaha. Adita bilsirangna skang jatrangni gisepo meligrikgijanirang aro kajia-golmalrang ong•anirang sokbaaha.  Indiba Zubeen sagi ia a•gilsakko wate re•angon, manderangni gisepo meligrikgijanirang gimaangaha aro pilak toromni manderangan nokdangsan ong•e Zubeen sagina kakket bichalko nanga ine ku•cholsan dabiaha. Jripjrip kalimanirangko dakanichi Assam uni gitcham chasongrango gita meli-nangrimani aro ku•cholsan ong•aniko man•pilaha.

Zubeen Garg-ara sawa – git ring•gipama, dokgipa-dam•gipama, jatni dakbewalko tangmesokgipama ma mandesal ong•aniko mesokgipama? Ua ia pilak janapgiminrangan ong•a. Zubeen sagi changa-sapani aro jatni dakbewalko tangmesokgipasan ong•aija indiba songsarna on•kange kam ka•gipaba ong•a. Ua namen ga•sugipa git ring•gipa, git tarigipa aro segipa, music director, actor aro jawilwat tarigipaba ong•a aro ua songsarna dingtang dingtang kamrangko ka•e dangdike on•angaha. Git ring•anian uni ku•aganani bewal, indiba mandesalna kam ka•anian uni janggi tangani miksongani ong•a. Uni gitrangchi, kenani gri janggi tanganichi ua manderangni pal chandenggipa aro- jakgitelani, kakketani aro mikkang nitegijaniko tangmesokgipa ong•aha.

Ru•uta bilsirangoni Assam-ni dingtangmanchagipa janggi tangani dakbewalrangko chasong gitalo mesoke janggi tanggipa Zubeen sagi-an ong•achim jean an•tangni dingtangmanchagipa changa sapaniko jakkale manderangko nangrimataha. Borgeet aro Naam-Kirtan-chi mandeni janggi tangani aro mikkang nitegija pilakkon apsangrik ong•atani gimin aganprakgipa Srimanta Sankardeva aro Sri Sri Madhabdeva-oni, ka•srokgipa Zikir-rangchi tom•tomani aro jatni gisepo meli-nangrimani gimin sulrangko ring•gipa Peer Ajan Fakir-ona, ru•uta bilsirangna Assam an•tangni gisepo ku•cholsan ong•aniko maniangaha. Ja•mangipa bilsirango

Lakshminath Bezbaroa, Jyoti Prasad Agarwala, Bishnu Prasad Rabha, aro Bhupen Hazarika sea-jotachi, dakmesokachi aro doka-dam•achi ia apsan chanchianirangko gipatroroangaha. Zubeen sagiba apsandaken ja•kurangko de•angaha aro ua kenani gri, changa-sapaniko jakkale, mandesalna kam ka•na skani gisikko mesokaha. Unade, uni changa-sapaniara manderangko an•saoatnasan ong•aija indiba manderangni ka•tongrangko doktikani aro uamangko meli-nangrimatani cholba ong•a.  Uni gitrang, kattarang aro kamrang mandeskana ka•sachakani, ka•dongani aro meli-nangrimaniko mesoka – aro iarangara Assamese manderangni janggi tangani bewalrangan ong•a.

Bilsi kolatchirangna baten, Zubeen sagi Assam-na doka-dam•ani aro gisikni an•saoaniko on•aha.  Uni sianiko knae bang•a million manderangan jagok-jabrang ong•aha, aro a•dok jrip-chi•chang ong•aha. Dokkanrang chipaha, sorokrang bangbang ong•aha aro noktangni mandeko gimaata gita chacha manderang kalimaha.

LGBI Airport-oni Sarusajai stadium-ona re•jomangon mande siana kalimanirango mande bang•batgiparangoni damsa ong•aha – song chel•arangoni aro dingtang dingtang biaprangoni manderang re•bae Guwahati-ni sorokrango gapataha, Sarusajai-gita re•jomaha aro uko so•chakgipa Kamarkuchi-ona sokeaha. Uni manggisiko ra•baanio re•jomani aro so•ani somoion bang•a manderangan re•bae, a•gilsak gimiko mande sianio manderangni bak ra•ani bang•batgiparangoni brigipa ong•aha.

Zubeen sagi-ko uni git ring•ani, git tariani aro jawilwat tarianinasan ong•aija indiba uni kakketanina, an•tangko onatanina, manderangna ka•saanina aro Assam-ni janggi tangani bewalrangna rasong chaaninaba manderang namnika. Ua manderangna namen ka•sachakgipa aro mamung gaora de•ani gri, donnuao dakchakgipa ong•achim.

Zubeen ong•telaigipa a•brirang, chiring-chibisikrang, bol-wa•arang aro do•o-matrangnaba noktangni mandena gitan ka•saachim. Bollywood-o saksa chu•sokgipa ong•egenchimoba ua biaptang aro mandetangrangni sepango ong•na Assam-ona re•bapilaha.

Ua an•tangni samtangtangko ripingna namen gisik nanggipa ong•achim. Guwahati-ni Dighalipukhuri-ni gitcham bolrangko sorkarini den•na chanchion, Zubeen ua biapona daariangaha aro mamungna kengija jegalanirangko dakangaha. Manderang unbaksa jegalanirangko dakpaaha aro uandake sorkari ua bolrangko den•jaha. Doka-dam•anina, manderangna ba ong•telaigipa samtangtangnaba ong•chong, Zubeen sagi an•tangni bebera•anio kim•kim ong•e chadengaha.

Zubeen sagi cholgri-apgri aro bilgrigiparangni pal chadenggipaba ong•achim. Gipinrangni galchipe dongipa obostarangni giminba ua parak ong•e aro kengija agananirangko dakachim. Ku•mitu ra•ani, kakketgijani aro namgijani bidingo ua sing•doanirangko dakachim aro an•tangna sinjetanirangko ra•bagenchimoba ua an•tangni chanchianirangko parakatna kenjachim. Bang•bata mingsinggipa manderangan an•tangna namgija bimungrangko ra•bana kengenchimoba, Zubeen uamang gita dakjachim. Ua politics kal•na namnikjachim aro uni indake ka•donganina manderang uko namnikachim maina uamang Zubeen sagio an•tangtangni ka•onanganirang aro ka•donganirangko nikachim.

Namen mingsing-minggamaniko man•genchimoba Zubeen sagi an•tangko onatgipa ong•achim. Ua Guwahati-ni sorokrango re•rame roe, soroksamni dokkanrango cha•anirangko cha•e, manderang baksa an•tangni ripengtangrang gitan golpoe roachim. Manderangko uko ka•sabee “Zubeen da” ine okamachim. Indake uni melina changanina, uni siani ja•mano bang•a million manderangan namen ka•a be•aha.

Bida aro u•i-ma•sianichi songsaro dingtanganiko ra•bana inenba, poraiani ranta gride Assam-ni gamocha-de manderangko jokatna man•ja ine ua aganaha. Jatni dakbewalrangko ripinganikosan dakaigija poraia-skiani aro u•i-ma•siani gnanggipa chasongko ra•baanian jatni bil chong•mot ine ua aganaha. Ki•taprangko poraianichi gisikrangko apalata aro songsaro namgipa dingtanganiko ra•bana man•a ine ua bebera•achim. U•i-ma•siani, gisik a•ning bite chanchibewalani aro dingtangmancha changa-sapanirangchisa jattangna chong•mot ka•saaniko mesokna man•a aro iarang pilakkon ki•taprangko poraianichi ranta ka•na man•a ine Zubeen sagi aganaha.

Zubeen sagi jat aro toromko basejaha. “Ango isol dongja, torom dongja, anga jakgitel. Angan Kanchenjunga” ine ua aganrongachim. Haida ua ia kattarangko songsaro meligijanirangko nike ka•onange aganengnaba gnang indiba ian uni ka•sachakani, kakket ong•ani aro pilakna ka•saanian kakketgipa torom ong•a ine aganani bewal ong•achim. Uni sianio ia kattarangko bilakbate u•ina man•aha.

Assam-ni itihas-o ian skanggipa changna kamalrang, maulana-rang aro monk-rang damsan uko so•ani somoio re•bae bi•rimanirangko dakangaha. Sonapur-ni Kamarkuchi-o uko so•gipa biapona da•ona kingking manderang re•ange uko mande ra•anirangko dakengkua. Uni git “Mayabini…” pilak jat aro toromni manderangnan bi•ani gita chacha ong•aha. Sonapur-o donggipa ‘Zubeen Kshetra’ gitalgipa Assam-ni bi•chakram biap ong•aha.

Zubeen Garg-ni janggi tangani aro u•ina man•gijagipa obostao uni sianganiara gitalgipa chanchibewalaniko ra•baaha. Kakketgipa torom-ara niam-retirangko ja•rikanio ong•ja indiba ka•sachakani, aro mandeska baksa meli-nangrimanisa ong•a ine ua mesokaha. Bebera•anichi manderangni gisepo ekgrikanirangko man•enggipa ia a•gilsako, mandeskana ka•saanian olakkiani aro bebera•ani chubatgipa gadang ong•a aro indake dakanichi a•gilsako tom•tomani aro meli-nangrimaniko ra•bana man•a ine gisik ra•ataniko on•a.

Zubeen Garg saksa git ring•na changgipasan ong•aija indiba ua manderangna skie ra•ani cholko on•gipa ong•a. Uni janggi tangani aro chanchiani bewalrangko ma•sie ra•na nanga. A•gilsak gimikni scholar-rang, gisik a•ning bite chanchigiparang aro social scientist-rang Zubeen Garg-ko ia chasongni gisik seng•batgipa manderangoni saksa ine ra•chakna  nanga. Uni changa-sapani, janggi tangani aro chanchibewalanirangoniko poraie nie sandirikkite nianirangko dake ki•taprangkoba chapa ka•na man•gen.

Zubeen Garg-ni janggi tangani indinari bon•angjawa. Uni kamrang aro chanchibewalanirang Assam-ni manderangko chasongni chasongna skie on•angkugen. Mandeni janggi tanganiara bilsi ru•utanio ong•ja indiba uni su•uaniosa gamchata. Ua seng•gnang siangahaoba uni janggi tangani teng•suaha aro uni similani pilakchin gipangaha. Ben Johnson-ni segimin poedo-ni ritingrango gita:

“….

Ua walo ga•ake sigenchimoba—

Uan teng•ani bipang aro bibal ong•a.

Chone chone an•ching uni nitoanirangko nika;

Aro chona chona kamrango janggi tanganiara jeani gri ong•a.”

Zubeen Garg-ni kattarang Assam-ni ka•tongo pangnajolna dongkamgen.  An•chingni uni gitrang, sulrang, ku•rang aro chanchibewalani ortorangko u•ina jotton ka•na nanga. Pilak nokdangrang, dolrang aro skie ra•chakram biaprang an•chingni ka•sabegipa Zubeen Garg-ko chasongni chasongna tange rakkina maiaba gisik ra•ani kamko dakna nanga.

Na·simang iakoba nina man·gen: 

Na·simang iakoba poraina man·gen: Chang 49-gipa 100 Drums Wangala manianiko CM do•ga oe on•anga

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub