Shillong, Jylliew 25 : Ki Pulit ka South West Khasi Hills (SWKH), kila kem ia uwei u nong Uttar Pradesh ba 22 snem, na Surat, Gujarat mynta ka taiew halor ka kam cyber blackmail kaba ki Pulit ki ong ba ka dei ka daw bah ba pynlong ia kawei ka thei samla na SWKH ban dkhat jubor iala ka jingim ha u bnai Iaiong.

Kane ka jingkem kala mih hadien ka jingujor da ka jingthoh bala mudui da ka Balapynhun Nongrum ba na Mawkyrwat, kaba pyntip sha ki Pulit ba ka para jong ka, kala iap da kaba sdien phasi ha ka 19 tarik Iaiong, 2026 kumba 6:40 baje janmiet hadien ba ka ioh pdiang ia ki jingbyrngem byrsit ba laiphew jait.

Kat kum ka ejahar, une u nong Uttar Pradesh la kynnoh ba ula ioh ia ka dur bad ki video jong kane ka thei samla bad byrngem ban pynsaphriang ia ki hapoh Whatspp bad Instagram lada kam ai ia kaei kaba u dawa.

Halor kane ka ejahar, ki Pulit ka Mawkyrwat Women Police Station kila register ia ka case hapoh ki kyndon ka Bharatiya Nyaya Sanhita bad ka IT Act, bad sdang pynlong ia ka jingtohkit.

Haba buddien ia ki sakhi satar digital, kala ialam ia ka kynhun tohkit sha Surat District, ha kaba ka kynhun ki Pulit ka SWKH, ryngkat ka jingiarap ki Pulit ka Palasiya Police Station ha Gujarat, kila ioh kem ia une u briew ha ka 23 tarik Jylliew ha ka por kumba 2:30 baje janmiet.

Une u briew ba shah kem u kyrteng u Sachin Nishad (22), khun u Yogendra Nishad bad u nongshong shnong ka Bhidoor, Ambedkar Nagar ha Uttar Pradesh.

Ia une u briew la ialam tian bishar hakhmat ka Iingkashari Judicial Magistrate First Class bad ka Iing kashari kala ai ia ka bor ia ki Pulit ba kin wan ialam ia u sha Mawkyrwat.
Ha ka kyrwoh ba pynlait ha ka sngi Palei, u Superintendent of Police ka SWKH ula kyntu ia ki padibah khamtam ki samla bad ki lanot jong ki kam shah pyndik lyngba ki kor online, ba kim dei ban shu sngap lane leh ia ki kam kiba long palat liam.

Ki Pulit kila ban jur ba ki cyber blackmail, sextortion bad ki jingbyrngem ban pynsakhriang ia ki dur ne videi shimet ki dei ki kam bymman ba shyrkhei bha bad ki nongpyntreikam ia ka ain kila kut jingmut ban leh tyngeh pyrshah ia kiba donkti.

Ki Pulit ka District kila kyrpad ia kino kino kiba mad ia kum kine ki jingshah pyndik ba kin wad ia ki jing iarap ba mardor lyngba ki helpline, kynthup ka Emergency Police number 112, Cyber Crime Helpline 1930, Women Helpline 181 bad kiwei kiwei.
Ka jingtohkit ia kane ka case ka dang iaid shakhmat.